9 sept. 2012

San Pedro Claver

Na Capela do Pazo de Mariñán, unha das tallas do retablo, aínda non está moi claro a quen representa. Unha boa parte opina que é San Pedro Claver. Un santo non moi coñecido a nivel popular, o que é pouco cotián nos pazos. Parte da iconoloxía parece non coincidir, pero en calquera caso, hoxe 9 de setembro e o día de San Pedro Claver.

Pedro Claver naceu en Verdú o 26 de xuño de 1580 e faleceu en Cartagena de Indias o 9 de setembro de 1654. Fillo de labregos ingresou na Compañía de Xesús e decidiu evanxelizar os territorios conquistados en América. Estudou teoloxía en Bogotá e foi enviado a Cartagena de Indias onde sería ordeado sacerdote.

En América impactoulle enormemente o trato que sufrían os escravos e dedicouse a coidalos, alimentalos e curalos, ata o punto de asinar sempre coa mesma frase: Ego Petrus Claver, aethiopum semper servus (eu Pedro, escravo dos negros para sempre). Por iso é considerado o Patrono dos Escravos.

Tivo sona de santo en vida entre a poboación que lle atribuíu varios milagres. Figura discutida pola súa entrega humanitaria, non foi beatificado ata o 16 de xullo de 1850 por Pío IX e canonizado o 15 de xaneiro de 1888 por León XIII, un papa de gran sensibilidade social.

É tamén o patrono de Colombia.

No hay comentarios:

Publicar un comentario